歐聯 重遇舊東家 希古恩基迪拉做落艦英雄

作者:Estelle 發表日期:2017-06-02 04:02:02

明晚歐聯決賽,施丹率領皇家馬德里倒戈祖雲達斯,恩怨情仇一鋪清!成名於意甲祖雲達斯,師承意大利名帥安察洛堤嘅施丹,於2次爭歐聯及世界盃嘅關鍵之戰,遇上祖記及意國人,都吃咗大虧,甚至黯然結束球員生涯。咁啱施丹教波生涯,爭取第2個歐聯獎盃,又面對祖記,力求走出陰霾見青天。另一邊廂,希古恩、基迪拉倒戈亦要踢爭氣波,延續皇馬棄將旺捧歐聯嘅定律。

施丹球員時代效力祖記5年,於2001年以破當時轉會費紀錄轉投皇馬,1年後即於「銀河艦隊」首嘗歐聯冠軍滋味。不過,翌年衞冕卻於4強被祖記淘汰,當時施丹入波都無補於事。2006年施丹要幫法國奪取第2個世界盃錦標,決賽遇上以祖記球員為骨幹嘅意大利,一下「施丹頭槌」斷送英名,黯然黯然掛靴。施丹嘅歐聯及世界盃「二次冠軍」美夢,都被祖記人破壞,令佢對昔日成名球會又愛又恨。

不過,施丹多得皇馬皮里茲栽培,2013年聘請安察洛堤執教,派施丹任副手,一心提攜佢做隔代主帥。呢位法國球王盡得「歐聯專家」安察洛堤真傳,上屆即捧盃,今屆8強仲踢走由「肥安」帶領嘅拜仁慕尼黑,總算為破意國枷鎖,走出第1步,但今仗重遇祖記,先至係真正「打大佬」。皇馬射手艾華路莫拉達同樣倒戈,兩年前佢未能幫祖記捧歐聯,今次就要助母會皇馬圓夢。

祖雲達斯亦有2位皇馬舊將希古恩、基迪拉倒戈,兩人都曾於「銀河艦隊」有過風光日子,最終不獲留用。不過「落艦」唔代表走下坡,往往反而係展開事業第2春,施多夫離開皇馬後,為AC米蘭2次捧歐聯,史奈達、洛賓「落艦」後,分別為國際米蘭、拜仁慕尼黑奪得呢項殊榮。最經典嘅「落艦英雄」係安歷基,由皇馬轉投巴塞,改變咗一生,2年前以教練身份為巴塞捧歐聯冠軍。希古恩、基迪拉今次倒戈,能否重演前人好戲,大家拭目以待。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170602/bkn-20170602025205816-0602_00882_001.html




Tag:
本文鏈接:http://www.hkcar-rental.org/10151.html